C.1. 需求定律 (Law of Demand)

需求定律 指出：

• 喺其他因素不變嘅情況下，當某物品嘅價格上升，咁佢嘅需求量就會下降。相反，當某物品嘅價格下降，咁佢嘅需求量就會上升。

先解一吓需求定律入面出現咗嘅幾個詞彙：

• 需求量
  • 需求量係指當貨品處於某一個價格時，消費者願意並有能力購買該貨品嘅數量。
• 價格
  • 需求定律入面嘅價格係指物品嘅“全部價格”。
    • 全部價格 = 貨幣價格 + 非貨幣價格
    • 簡單嚟講“貨幣價格”就係指貨品賣緊幾錢。
    • “非貨幣價格”就係指消費者喺購買貨品時“無形”嘅成本，例如“時間”。不過除非問題間確指出有“非貨幣價格”，否則我哋都唔駛理。
    • 另一種講法就係“物品嘅價格係指買家購買該物品使所需嘅付出”（因此“價格”就係“全部價格”）。
  • 至於“定價”嘅方法就包括有“名義價格”同“相對價格”。
    • “名義價格”喺指用金錢嚟表達某物品嘅價格。
    • 而“相對價格”就係指用“放棄其他物品嘅數量嚟表達某物品嘅價格”。
      • 例如一條牛仔褲嘅價格係$300，一張戲飛嘅價格係$60。咁牛仔褲嘅相對價格係“5張戲飛”。

除咗了解D詞彙之外，我哋亦要留意需求定律成立嘅條件係“其他因素不變”。

• 咁係因為某物品嘅需求量除咗受物品本身嘅價格影響之外亦會受到其他因素影響。
  • 例如潮流、天氣、消費者嘅收入、整體社會經濟環境、其他相關或競爭物品嘅價格等等。

C.1.1. 需求的定義

需求係指喺一段時間內、當其他因素不變嘅情況之下，消費者喺不同價格願意並有能力購買嘅物品數量。

• 唔知你覺唔覺得需求嘅定義同“需求量”嘅內容好似呢？不過大家要記住同識得分：
  • 需求量係喺某一個價格下消費者願意並有能力購買嘅物品數量
  • 需求係喺不同價格下消費者願意並有能力購買嘅物品數量。
    • 因此，需求係講緊“多個唔同價格下嘅需求量”。

C.1.2. 表達需求的方法

因為需求係講緊“多個唔同價格下嘅需求量”，所以通常我哋會用“需求表”或者“需求曲線圖”嘅形式嚟表達需求。

• 下面就顯示咗某一物品嘅需求表同需求曲線。

• 通常我哋會用D、D₀、D₁等嚟標記唔同嘅需求曲線（因為需求英文係“demand”）。
• “利用需求表嚟畫條需求曲線”同“從需求曲線上睇返唔同價格下嘅需求量”嘅技巧同數學入面坐標幾何學嘅技巧係一樣嘅。
• 通常需求曲線都係一條向右下傾斜（即斜率係負數）嘅曲線。
  • 咁係因為根據需求定律，如果價格上升，需求量就會下降。
• 而為求簡化個情況，喺文憑課程入面嘅需求曲線應該會係直線。

C.1.3. 需求嘅分類

• 需求可以分為“個別需求”同“巿場需求”。
  • 個別需求可以係指某人、某群體或巿場內某指定範圍對物品嘅需求。

巿場需求就係整個巿場對物品嘅需求。