B.4. 分工

簡單嚟講， 分工 (Division of labour) 即係由唔同嘅人嚟負責唔同嘅生產工序嘅工作。

B.4.1. 種類：簡單、複雜和區域分工

分工嘅種類有三種：

1. 簡單分工
   • 簡單分工係由個別人士獨自負責生產某一種商品或者提供某一種服務。
     • 簡單嚟講可以話係“專業人士”或“專才專用”。
   • 例子：醫生、裁縫。
2. 複雜分工
   • 複雜分工係指將一個生產過程分成數個不同嘅工序，而每位工人就只係負責某個(或數個)工序。
     • 簡單嚟講即係我哋最常講嘅“分工合作”。
   • 例子：喺玩具工廠嘅生產線上，每個工人只負責一部份嘅生產工序。例如裝配、上色、檢測、包裝等等。
3. 地區分工
   • 喺地區分工入面，唔同嘅地區或國家專門生產某種產品或提供某種服務。
   • 例子：中環專門提供商業服務、沙地亞拉伯專門出產石油。