A.3. 三個基本經濟問題

所謂 三個基本經濟問題 其實係當個人或社會面對有限資源及當唔同選擇會帶嚟唔同利益及成本嘅時候會要諗嘅問題。

A.3.1.    三個基本經濟問題 : 生產甚麼？怎樣生產？為誰生產？

當資源可以用嚟生產唔同嘅嘢（經濟學上叫生產出嚟嘅嘢做“產出”）嘅時候，只要我哋用依D資源生產某一種產出，咁即係可以用嚟生產其他產出嘅資源就會減少。而“生產甚麼”嘅問題就會因此出現。

• “生產甚麼”所包括嘅範圍有：
  • 生產咩種類嘅產出同要生產嘅數量。
  • 而另一方面亦代表咗決定唔生產咩產出。

當決定咗要生產咩嘅時候，下一個要面對嘅問題就係“點生產”（即“怎樣生產”）。

• 當然，假如某一種產出只有一個方法可以生產佢出嚟，“點生產”嘅問題唔會出現。
  • 不過我諗喺現今社會入面，依個情況極少出現。
• “怎樣生產”所涉及嘅範圍基本上就係整個生產嘅過程。
  • 例如用咩方法同工具嚟生產。
• 而我哋要用諗點生產係因為：
  • 我哋想將生產成本降到最低
  • 我哋想用同一數量嘅資源生產出最多嘅產出
  • 另一種講法就係要有效率咁生產產出同滿足更多嘅慾望。
• 留意因為“怎樣生產”會影響成本、產量，所以佢好多時都會影響到“生產甚麼”嘅決定。
  • 例如今日我哋可能會決定生產產出A。但聽日可能有人發明一個新方法令生產產出B嘅成本大幅下降，咁好能我哋就會改變我哋“生產甚麼”嘅決定。

第三個基本經濟問題就係“為誰生產”。

• 基於資源嘅稀少性（即資源係有限嘅），產出都係有限嘅。
  • 因此就唔係全世界嘅人都可以得到產出。
• “為誰生產”所涉及嘅問題係制定準則、機制嚟決定邊個可以得到依D有限嘅產出。
  • 作為一個經濟社會，好多時我吔都係用“先到先得”、“價高者得”準則嘅決定邊個可以得到產出。
  • 但亦有好多例子係我哋先決定咗“為誰生產”，之後先生產產出。
    • 例如以前“居者有其屋”嘅樓就係政府放棄最高嘅利益、為社會入面某些特定人仕（即合乎申請嘅人仕）而興建嘅樓宇。